Hararei tūmatanui o Matariki

Kua pānuitia e te Kāwantanga ngā rangi kua whakapūmatia ki te hararei tūmatanui o Matariki

Nō te rangi nei pānuitia ai ngā rā hou mō te hararei tūmatanui o Matariki e te Kāwanatanga i runga i ngā tohutohu a Te Rōpū Aratiki o Matariki. Kua whakapūmautia ēnei rā hei rā whakanui i a Matariki mai i te tau 2022-2052.

Ko te rā okioki tūmatanui tuatahi e whakanuia ai a Matariki ko Paraire te 24 o Hune 2022. 

Kua whakatau te Kāwanatanga ka whakaū ia i te mātauranga Māori kei te matū o te hararei tūmatanui o Matariki, ā, he wā tēnei hei:

  • Hokinga mahara – Te whakanui i te hunga kua riro mai i te aranga o Matariki o mua atu
  • Whakanui i tēnei wā – Te huihui tahi ki te whakawhetai mō ngā painga kei a tātou
  • Titiro whakamua – Te titiro whakamua ki tā te tau hou ka kawe mai

Matariki

He whakarāpopotonga a Matariki mō ‘Ngā mata o te Ariki Tāwhirimātea’, ā, e kōrero ana mō tētahi kāhui whetū nui, e mōhiotia ana hoki ki ingoa kē atu, arā, ki a Pleiades. 

Ko te rewanga o Matariki i te pae i ngā rangi o te takurua koia ko te tohu o te huringa o te tau me te tīmatanga o te tau hou Māori. Ko ētahi iwi ka whakanui i te rewanga o Puanga, e mōhiotia ana hoki ki ingoa kē atu, arā, ki a Rigel. Ki ētahi atu iwi ko te tōnga o Rehua, e mōhiotia ana hoki ki ingoa kē, arā, ki a Antares, te tohu o te huringa tau.

Ka noho mai ko te wā o Matariki te rā okioki tūmatanui tuatahi e whakamānawa ana i Te Ao Māori. 

Mātakina ngā ataata kei raro iho nei e ako ai koe mō Matariki i Te Rōpū Aratiki o Matariki.

He aha a Matariki?
Ngā whakamārama mō Matariki
Ngā whakamārama mō te wā hararei tumatanui o Matariki?

Mō te hunga tukumahi, ka whakapūmautia te whakanuitanga o Matariki hei rā okioki ā-motu. Mō ētahi atu taipitopito kōrero mō ngā pānga ki tō pakihi me ngā ahunga whakamua, toroa te pae tukutuku a Employment New Zealand.

Te pae tukutuku a Employment New Zealand(external link)

Pānuitia te pūrongo a Te Rōpū Arataki e pā ana ki te rā mō Matariki.

Matariki dates 2022 - 2052 – Matariki Advisory Committee [PDF, 163 KB]

Pānuitia te pūrongo a Te Rōpū Arataki e pā ana ki ngā whanonga pono mō ngā whakanuitanga o Matariki.

Values for Matariki celebrations – Matariki Advisory Committee [PDF, 165 KB]

Ngā ahunga whakamua

E whakapūmautia ai te rā o Matariki, ka tuhi hukihukitia tētahi Pire hou. Ka whakatakatotohia tēnei Pire i te tau nei, ā, ka whai wāhi hoki te tangata ki te tuku whakaaro ki te Pire hei te taunga ki te hātepe Komiti Whiriwhiri.

Te hātepe Komiti Whiriwhiri(external link) – Te pae tukutuku a Pāremata Aotearoa

Te Rōpū Arataki o Matariki

I whakatūria e te Kāwanatanga tētahi rōpū Arataki mō Matariki ki te whakatau i ngā rā me ngā mahi e whakanui tahi ai a Aotearoa i a Matariki hei rā okioki tūmatanui hei te tau 2022 haere ake.

Ko tā te rōpū nei he whakaemi mai i ngā tohunga nō Aotearoa whānui, e mātau ana ki Te Ao Māori me te mātauranga e hāngai pū ana ki a Matariki me te maramataka.

Ko Tākuta Rangiānehu Mātāmua kua kopoua nei hei Heamana, ā, māna te Rōpū e ārahi. Ko ngā mema: ko Hoturoa Barclay-Kerr, rātou ko Rereata Makiha, ko Victoria Campbell, ko Tākuta Pauline Harris, ko Tākuta Ruakere Hond, ko Jack Thatcher. E tohutohu ana te Rōpū i ngā Minita e pā ana ki:

  • te rā e whakanuia ai a Matariki mō ngā tau 30 te haere ake,
  • te whakanui tika i a Matariki, me
  • ngā rauemi mātauranga, hapori hoki me hanga e pai ake ai te mārama me te mātau o Aotearoa whānui ki a Matariki.

E ārahi ana te rōpū i ngā mahinga tahitanga ki te Māori, ngā iwi o Te Moana-nui-a-Kiwa me ētahi atu iwi whai-pānga mō te āhua ki te whakanui i a Matariki.

E āwhina ana a Te Arawhiti me Hīkina Whakatutuki i te Rōpū mā te whakatutuki i ngā mahi taunaki.