Tono Marohitanga o Te Tahua Whakakaha o Te Pūnaha Hihiko: Vision Mātauranga 2024

He aha te pūtea e wātea ana?

Ko te pūtea katoa e wātea he $4.0 (hāunga te GST) i ia tau, otirā ko te toenga o te $2.0 miriona (hāunga te GST) i ia tau, ka tohaina ki ngā kirimana o te wā nei mai i ngā huringa haumi o mua a te Tahua.

Ka eke ki te rua tau te roa o ngā hōtaka mahi mō te Kaupapa Tūhono me te Kaupapa Ika Tauhou. Mō ia kaupapa me te hōtaka mahi:

• atu ki te kotahi tau te roa, ko te pūtea mōrahi mō ia marohitanga angitu he $150,000 (hāunga te GST).
• kei waenga i te kotahi me te rua tau, ko te pūtea mōrahi mō ia marohitanga angitu he $250,000 (hāunga te GST). Ehara i te herenga te tono i te pūtea katoa e wātea ana, kia eke rawa rānei ki te rua tau te roa.

Me hāngai pū ngā utu o te kaupapa ki te hōtaka mahi. Ka taea te whakamahi i ngā pūtea ki te utu i ngā utu o te whanaketanga hōtaka mahi, te tuku me ngā utu whakahaere (tae atu ki ngā hāereere). Kāore ngā whakapaunga pūrawa e kapi i ngā pūtea.

Ko wai e āhei ana ki te tono?

E whai whakaarotia ai te marohitanga kia aromatawaitia mō te Kaupapa Tūhono, te Kaupapa Ika Tauhou rānei, me tutuki ngā paearu māraurau katoa e takoto ana i raro nei. Ki te kore mātou e whakaaro ake ka tutuki i ngā marohitanga ēnei paearu, ka whakakorea te tono pūtea i runga i ngā take māraurau.

E māraurau ai koe ki ngā pūtea, ko tā ngā marohitanga:

• Me whakahaere Māori, whakahaere rangahau, kairangahau takitahi rānei, ā, me hinonga manature o Aotearoa taua whakahaere, e āhei ai ki te tuku tono.
  • Ko te whakahaere Māori he rōpū whakahaere e tautuhi ana i a ia anō hei Māori, ā, ka whakamahi (ka hiahia rānei ki te whakamahi) i te rangahau, te pūtāiao me te hangarau, aua tūmomo mahi rānei.
  • Ko te whakahaere Rangahau he rōpū whakahaere e whai āheinga rāroto ana ki te whakahaere i te rangahau, te pūtaiao me te hangarau, aua tūmomo mahi rānei. Kāore ngā tari Kāwanatanga (e tautuhia ana i raro i te Āpitihanga 2 o te Public Service Act 2020) e kīia ai he whakahaere Rangahau, ā, kāore e āhei ana ki te tono pūtea.
  • Ko te kairangahau takitahi kua tautuhia hei tangata e mahi takitahi ana, ā, kāore i te mahi mā tētahi whakahaere Rangahau, engari e taea ana e ia te kawe i ngā mahi rangahau, te pūtaiao me te hangarau, aua tūmomo mahi rānei.
• Me whakauru i tētahi whakahaere Rangahau, he kairangahau takitahi rānei me tētahi whakahaere Māori, otirā ko tētahi o ēnei me noho hei whakahaere ā-Kirimana, ā, ko tētahi atu he whakahaere Hoa Rangapū.
  • Me kore te hononga e noho noa iho ki waenga i tētahi kaitono me tētahi whakahaere e kīia ana he hinonga matua, he hinonga iti, he hinonga-taupuhi rānei a tētahi atu whakahaere; i waenga rānei i ngā tari o tētahi whakahaere kotahi (hei tauira, he whare mātauranga matua).
• Mō ngā mahi ka uru ki tētahi anake o ngā kaupapa e rua, e takoto ana ngā herenga o tētahi o aua kaupapa e rua ki te Mahere Haumi a Te Tahua Whakakaha o Te Pūnaha Hihiko: Vision Mātauranga. Mō te Kaupapa Ika Tauhou, me whakaingoa te marohitanga i te(ngā) tangata ka noho hei ika tauhou.
• Kāore mō ngā mahi kua oti kē i tētahi atu tari kāwanatanga te tuku pūtea.
• Kāore he ākonga whare wānanga wā-ukiuki, kāore hoki ngā ākonga kura e whai wāhi ake.
  • Kāore ngā marohitanga e whai ana i ngā mahi hōtaka mahi e māraurau ana ki ngā pūtea mai i Te Tāhuhu o te Mātauranga, mai i a Unlocking Curious Minds rānei, e tino hāngai ana ki Te Tahua Whakakaha o Te Pūnaha Hihiko: Vision Mātauranga. Me whakatau i tētahi, neke atu rānei o ngā tāhū o Vision Mātauranga, ā, me kaua e whakatau i te hauora anake.
  • Ko ngā haumitanga e ārahitia ana e MIE e takoto ana ki te Mahere Haumi me ngā haumitanga a te Kaunihera Rangahau Hauora (HRC), he mea hoahoa kia hāngai ai tētahi ki tētahi. Kia kore ai e tāruaruatia ki ngā haumitanga a te HRC, kāore a MBIE e tuku pūtea ki ngā hōtaka e hāngai pū ana ki te hauora anake. Ka whai whakaarotia ngā marohitanga e noho nei ngā whakapikinga hauora hei wāhanga o ngā putanga whānui ake.
• Me tū te nuinga o ngā mahi ki roto o Aotearoa tonu, māna, kua whai whakaarotia e MBIE ētahi take uruhi kia whai whakaarotia te marohitanga.
  • Mēnā ko te nuinga o te hōtaka mahi kei waho kē o Aotearoa, me whakamārama i te take i pēnei ai, ā, he aha i noho hei take uruhi. Mēnā he nui ngā hononga o te hōtaka mahi ki ngā mātanga mātauranga iwi taketake kei whenua kē, whakaaturia te hua o tēnei ki a Aotearoa.
• Me kore e whai hua mā tētahi rōpū kāwanatanga o Rūhia (tae atu ki, engari kāore e whāiti ki, te tautoko i ope tauā o Rūhia, ngā mahi haumaru rānei), tētahi atu rōpū i waho o te kāwanatanga rānei e tirohia ana tērā pea kei te whai wāhi ki te riri.
• Me tuku mā te Pūnaha Whakahaere Haumi (IMS) a MBIE, ā, me ū ki ngā herenga angawā, hōputu, ihirangi me ētahi atu herenga whakahaere kua whakatauria e MBIE.

Whakaritenga pūtea-taupuhi

Ehara te pūtea-taupuhi i te herenga mō tō kaupapa. Engari ki te riro mai he pūtea-taupuhi(e tētahi o ngā whakahaere), tēnā kōrero mai:

• te ingoa o te whakahaere,
• mēnā he moni, he whakaaro rānei te pūtea-taupuhi, ā,
• te nui o te pūtea i whakaratoa i ia tau (hāunga te GST).

Ko te āhua o te pūtea-taupuhi, he moni tonu, he tāpaetanga ā-whakaaro rānei.

• Ko te pūtea-taupuhi ā-moni , he moni ka riro mai i tētahi whakahaere, e tāpae hāngai ana ki tō kaupapa. Ko tēnei moni:
  • kāore e uru ngā moni i whiwhi koe i muri i te rā mutunga o te kaupapa
  • me noho waiwai ki te whakatutukitanga o te hōtaka mahi, ā, me moni motuhenga ka haere ki te kaupapa kua marohitia
  • ehara i te moni i ahu mai ai tētahi moniwhiwhi, ā, kāore hoki e taea te whakahoki ki te kaituku.
• Ko te pūtea-taupuhi ā-whakaaro, he tāpaetanga ehara i te moni, e whai wāhi hāngai ana ki tō kaupapa. Ka uru pea ki tēnei:
  • te whakamahinga taputapu, wā kaimahi, āheinga rānei ki ngā raraunga
  • ngā utu kaimahi ka utua e tētahi o ngā whakahaere. Hei tauira, ngā utu kaimahi ka utua e tētahi whakahaere mō te tangata kua whiwhi tūranga ika tauhou, mō te whakaruruhau rānei i taua ika tauhou rā.

Te tukanga tono me te aromatawai

Ngā rā matua

Tērā pea ka whakarerekētia ngā rā. Ka whakamōhiotia koe mā te īmēra ki te whakarerekētia. E tāpiritia ai koe ki te rārangi whakamōhio ā-īmēra, tēnā ohauru(external link) ki te whiwhi kōrero hou.

Ngā tuhinga matua me ngā ihirangi

I te wā e whakawhanake ana koe i tō tono, e whakahau ana mātou i a koe ki te tirotiro i ēnei tuhinga tohutoro matua:

Mahere Haumi 2024 - Te Tahua Whakahaka o Te Pūnaha Hihiko: Vision Mātauranga

Te Tahua Whakakaha o Te Pūnaha Hihiko: Vision Mātauranga

Aratohu aromatawai me te tuku piro a Te Tahua Whakakaha

Tukanga tono

Me whakakī ngā kaitono i ā rātou marohitanga ki tā mātou Pūnaha Whakahaere Haumitanga (IMS), he tomokanga tuihono haumaru. Hei āwhina i a koe ki te whakarite i tō marohitanga kua whakaratoa e mātou tētahi tātauira marohitanga.

1. Ka whakaurua, ka tukua hoki ngā marohitanga ki tā mātou Pūnaha Whakahaere Haumitanga - he tomokanga tuihono haumaru. Mānā kāore ō taipitopito takiuru IMS, me tono urunga(external link). I mua i te whakawhanake i tō marohitanga, ka whakahautia koe ki te whai whakaaro ki ngā paearu māraurau, ngā paearu aromatawai, me ngā ture me ngā here e pā ana ki tēnei Tono Marohitanga.
   
   Pūnaha Whakahaere Haumitanga (IMS)(external link) — MBIE Portal
   
   
2. Kei te tātauira marohitanga ngā tohutohu mō te āhua o te whakarite i tō marohitanga me ngā mōhiohio e hiahiatia ana. E tūtohu ana mātou kia whakamahi koe i te tātauira marohitanga i whakaratoa hei tuhi i ngā mōhiohio e hiahiatia ana mā te taupānga tukatuka kupu e hiahiatia ana, ā, ka rite ana ki te tuku, tāruatia ka whakapiri i ngā wāhanga e tika ana ki ngā āpure IMS tika me te tukuatu i ō tuhinga tautoko ina tohua.
3. Ka taea e ngā kaimahi a MBIE te āwhina i a koe ki te whakauru ki te IMS me te tuku ārahitanga me pēhea te tāuru kiko.
4. Ka whakamahia ngā mōhiohio kei tō marohitanga mō te aromatawai, otirā ka noho hei pūtake o te kirimana mō ngā kaupapa ka waimaria.
5. E pōhiritia ana ngā marohitanga reo Māori. Tērā pea ka whakahaeretia ki te reo Ingarihi te aromatawaitanga o ngā marohitanga. Ka kōwhiri pea ngā kaitono ki te tāpiri whakapākehātanga o tā rātou marohitanga, ka waiho rānei ki a MBIE ki te rapu kaiwhakapākehā, otirā e kore te kaitono e utu mō tēnei. Kāore he whakaaweawetanga o te kōwhiringa reo ki ngā putanga aromatawai. Me tuku atu ngā kaitono i ngā whakawhitinga reo ki te IMS, ā, me ū ngā whakawhitinga reo ki te wairua o te putanga reo Māori.

Te tukanga aromatawai

Ka whai pānga te tukanga aromatawai e whai ake nei:

1. Ka tuku marohitanga whiwhi tahua ngā kaitono.
2. Ka hihiratia e MBIE ngā marohitanga katoa, atu ki ngā paearu māraurau.
3. Ka whakaae/whakahē ngā kaiarotake i ngā marohitanga māraurau kua tuaritia ki a ia, me te puaki i ngā pānga taharua mēnā rā he pānga
4. Ka aromatawaitia ngā marohitanga māraurau katoa e ngā mema motuhake e whā, ka tauritea ki ngā paearu aromatawai, ā, ka whakaurua ki te IMS.
5. Ka hui, ka matapaki hoki te Pae Aromatawai i ngā marohitanga kia eke ki te tatūtanga tokitoki mō ngā marohitanga mariu, ngā whakahoki kōrero me ngā tūtohu e whai mōhio ai te pūrongo a te Upoko o te Pae.
6. Ka whakarato pūrongo te Upoko o te Pae, kei roto ngā tūtohu tuku pūtea, ki te Hēkeretari Tuarua o te Mahi, te Pūtaiao me te Hinonga.

Ngā mema o te Pae Aromatawai

Ngā paearu aromatawai

Ka aromatawai te Pae Aromatawai i ngā marohitanga, atu ki ia paearu i raro, ā, ka tuku piro mai i te 1 (kounga iti) ki te 7 (kounga nui).

Mā tētahi pae aromatawai e aromatawai i ngā marohitanga o te Kaupapa Tūhono me te Kaupapa Ika Tauhou, atu ki ēnei paearu. He 25% te taumaha o ia paearu.

Kairangitanga

Whanaketanga tangata, hononga me ngā pūkenga (25%)
Pātai Matua: He aha te whānuitanga o ngā pūkenga, te āheinga, ngā whatunga, ngā hononga me ngā arawātea rangahau wā-roa ka ara ake pea, ka toitū ake pea i te hōtaka mahi kua marohitia?

Te Āheinga ki te Whakatutuki Mahi (25%)
Pātai Matua: He aha te tūponotanga o tō whakatutuki i ngā putanga o tō hōtaka mahi kua marohitia?

Pāpātanga

Ngā Putanga o Vision Mātauranga (25%)
Pātai Matua: He aha te whānuitanga o te tautoko a te marohitanga i te kaupapahere o Vision Mātauranga me te tautoko i te huakitanga o te pitomata pūtaiao me te auaha o te mātauranga Māori, ngā rauemi me ngā tāngata, e whai hua ai a Aotearoa?

Ngā hua ki te rangahau, te pūtaiao me te hangarau (25%)
Pātai Matua: Whakamāramatia te āhua o ngā hua o te pikinga āheinga, raukaha, pūkenga me ngā whatunga i te rāngai Rangahau, Pūtaiao me te Hangarau (RS&T), ā, me te whakatutuki i ngā whāinga me ngā putanga o te kaupapahere o Vision Mātauranga?

Ngā whakahoki kōrero ki te kaitono

Ki mutu ngā tirotiro māraurautanga, ka whakamōhiotia ngā kaitono katoa mēnā e māraurau ana, ka kore rānei. Mēnā kāore e māraurau ana ngā kaitono, ka whakamōhiotia koe ki te take i kore ai.

Kia mutu te tukanga aromatawai katoa, ka whiwhi ngā kaitono katoa i te whakamōhiotanga ā-tuhi me ētahi kōrero whakahoki e pā ana ki ā rātou tono. Ka poua ngā whakahoki kōrero ki ngā mōhiohio i kohia i ngā mema pae aromatawai mō ngā āhuatanga pakari, ngoikore hoki o ā rātou marohitanga.

Ngā whakatau tuku pūtea

Mā te Hēkeretari Tuarua o te Mahi, te Pūtaiao me te Hinonga a MBIE e whakatau i ngā whakataunga haumitanga whakamutunga i runga anō i ngā tūtohu kei roto i te pūrongo a te Upoko o te Pae, ā, tērā pea:

• ka whakatauhia ētahi herenga kirimana-tōmua, hei whakatutuki i mua o te tuku kirimana mō taua haumitanga
• ka whakatauhia ētahi herenga motuhake hei āpitihanga ki ngā ture me ngā herenga arowhānui e noho ana ki te Kirimana Whiwhi Pūtea a te Tahua
• ka whakarerekētia te roa o te kaupapa
• ka whakarerekētia te pūtea ka tohaina
• ka herea kia whiriwhirihia anō te kaupapa kua marohitia, kia rata rā anō a MBIE, hei whakaata i te whakarerekētanga tuku pūtea
• ka whai whakaarotia ngā mahi o mua i roto i ētahi atu o ngā Kirimana Whiwhi Pūtea a VMCF I te wā e tūtohua ana kia whiwhi pūtea tētahi kaitono engari e nama tonu ana tētahi o āna pūrongo, kāore rānei i tutuki ngā takohanga ā-kirimana VMCF o mua i te wā o te tuku kirimana, ka puritia pea te kirimana hou kia tutuki rā anō ngā takohanga VMCF o mua. Kia mōhio mai, ka whakatōroatia pea te rā tīmata mēnā kāore anō i whakatauhia ngā takohanga ā-kirimana VMCF o mua.

Ka whakamōhio mātou i te kaiwhakapā a te marohitanga ki tā mātou whakatau tuku pūtea ā te Māehe 2024. Ka whakaputaina ngā kaitono angitu ki ā mātou whārangi ipurangi a Te Tahua Whakakaha o Te Pūnaha Hihiko: Vision Mātauranga, ā, ka pānuitia hoki mā tētahi pānui pāpāho, ka pānuitia rānei e ngā Minita Take Rangahau, Pūtaiao me te Auaha, me te Minita Whanaketanga Māori.

Tono Marohitanga o Te Tahua Whakakaha o Te Pūnaha Hihiko: Vision Mātauranga 2024

Te tukanga tuku kirimana

Ka kuhu ngā kaitono angitu ki tētahi Kirimana Whiwhi Pūtea me tētahi whakaaetanga hōtaka mahi me mātou (kia tutuki rā anō ngā herenga kirimana-tōmua).

Me waitohu, ka whakahoki i tēnei whakaaetanga ki a mātou i roto i te marama kotahi o te whiwhinga.

Ka mana ngā ture me ngā herenga o te Kirimana Tuku Pūtea o Te Tahua Whakakaha o Te Pūnaha Hihiko: Vision Mātauranga ki te whakaratonga o te pūtea kua whakaaetia ki waenga i a mātou me te whakahaere ā-kirimana. Mā te tuku i tētahi marohitanga, e whakaae ana koe ki ngā ture me ngā herenga o Kirimana Whiwhi Pūtea a Te Tahua Whakakaha o Te Pūnaha Hihiko: Vision Mātauranga. E wātea ana tētahi Kirimana Whiwhi Pūtea tauira i roto i tā mātou wāhanga o ngā Tuhinga me ngā ihirangi matua i runga nei.

Te utu i ngā pūtea

Me whakahaere rawa te kaipupuri kirimana i ngā pūtea kia pai ai tana whakarite i te kawenga o te hōtaka mahi me te ū hoki ki ngā herenga tuku pūrongo. I runga anō i ngā herenga kirimana motuhake, ka pēnei te whakarato i ngā pūtea a MBIE:

• 50% o te tīmatanga o te hōtaka mahi,
• 40% i te wā wawaenga (i muri i te tuku i tētahi pūrongo kokenga e pai ana ki a mātou), ā,
• 10% i te mutunga o te hōtaka mahi (i muri i te tuku i te pūrongo whakamutunga e pai ana ki a mātou). Ka whakarato te tūtohi e whai ake nei i tētahi tirohanga o ngā herenga pūrongo kirimana mō ngā kirimana.

Te tuku pūrongo me te aroturuki

Ka whakarato te tūtohi e whai ake nei i tētahi tirohanga o ngā herenga pūrongo kirimana mō ngā kirimana.

Me whakarite ngātahi i ēnei pūrongo, ā, me uru ngā mōhiohio mai i te kaipupuri kirimana me ngā whakahaere Hoa Rangapū, tae atu ki tētahi reta whanaketanga-taupuhi mai i te(ngā) whakahaere Rangapū ki te whakaū i te whakaritenga ngātahi o te pūrongo, ā, me te whakaū hoki i te tika o ngā mōhiohio kei roto i te reta.

Me uru hoki ki ngā pūrongo he mōhiohio o:

• te tūnga me te kokenga ki te kawenga o te Tauākī Pāpātanga me ngā Whāinga Rangahau kua kirimanatia
• ngā tāpaetanga pūtea-taupuhi (mēnā e whai pānga ana)
• ngā whakaritenga whakaruruhau (mō te Kaupapa Ika Tauhou)
• ngā whakatutukinga matua
• ngā mōrearea e maiea ana, ā, me ngā mahi ki te whakatau i ēnei
• tētahi aromatawai mēnā ka puta i te hōtaka mahi ētahi atu arawātea Vision Mātauranga, mēnā ka whakapiki ake te angitu o te kaupapa i ngā pūkenga me ngā whatunga, ā, me te whaihua o te hōtaka mahi whānui.

Ka tukua ngā pūrongo ki te IMS, ā, ka arotakea e mātou.

Tirohia ngā Aratohu Tuku Pūrongo a Te Tahua Whakakaha o Te Pūnaha Hihiko: Vision Mātauranga i ā mātou whārangi ipurangi a Te Tahua Whakakaha o Te Puna Hihiko: Vision Mātauranga mō ētahi atu taipitopito.

Te Tahua Whakakaha o Te Pūnaha Hihiko: Vision Mātauranga